«Ұмай» ипотекасы: әйелдерге арналған жаңа бағдарлама туралы не белгілі

Қазақстанда әйелдерге арналған «Ұмай» ипотекалық бағдарламасы тамыз айында іске қосылады. Бағдарламаны Отбасы банк жүзеге асырады, ал оны қаржыландыруға 45 млрд теңге бөлінген. Жаңа жоба баспана алуды жоспарлаған жұмыс істейтін әйелдердің тұрғын үйге қолжетімділігін арттыруға бағытталған.

«Ұмай» бағдарламасының мақсаты қандай?

«Ұмай» – ресми табысы бар әйелдерге жеңілдетілген шарттармен баспана сатып алуға мүмкіндік беретін ипотекалық бағдарлама. Оның ерекшелігі – тек алғашқы үйді ғана емес, тұрғын үй жағдайын жақсарту мақсатында екінші немесе үшінші пәтерді де сатып алуға мүмкіндік беруінде.

Бағдарлама аясында бастапқы нарықтағы дайын пәтерді, салынып жатқан тұрғын үйді (тиісті кепілдігі немесе сақтандыруы болған жағдайда) және қайталама нарықтағы пәтерді сатып алуға болады. Алайда қайталама нарықтағы тұрғын үй 2016 жылдан ерте салынбаған болуы тиіс.

Бағдарламаға кім қатыса алады?

«Ұмай» ипотекасына қатысу үшін негізгі талаптар өтініш беруші әйел болуы, ресми жұмысының болуы және соңғы 6 айдағы зейнетақы аударымдарының болуы керек

Өтінімдер балдық жүйемен бағаланады. Басымдық тұрғын үй жинақ депозитін ертерек ашып, ұзақ уақыт қаражат жинаған клиенттерге беріледі.

Ипотеканың негізгі шарттары

Қазіргі уақытта жарияланған негізгі талаптар:

• алғашқы жарна – 20%-дан бастап (ірі қалаларда);
• өңірлер үшін алғашқы жарна мөлшері төмен болуы мүмкін;
• несие сомасы 50 млн теңгеге дейін;
• несие мерзімі – 25 жылға дейін;
• алғашқы жарнаны төлеу үшін зейнетақы жинағын пайдалануға болады;
• қажет болған жағдайда екі тең қарыз алушыны тартуға рұқсат етіледі.

Пайыздық мөлшерлеменің нақты көлемі әзірге жарияланған жоқ. Алдын ала мәлімет бойынша, алғашқы жылдары мөлшерлеме шамамен 15% болып, кейін 3,5-5% деңгейіне дейін төмендеуі мүмкін.

Өтінім қабылдау қашан басталады?

Отбасы банк өтінім қабылдау тамыз айында басталатынын хабарлады. Жақын күндері бағдарламаның нақты іске қосылу күні, қажетті құжаттар тізімі және қатысу тәртібі жарияланады.

Соңғы жылдары тұрғын үй бағасының өсуі мен ипотекалық несиелердің қымбаттауы көптеген азамат үшін баспана алуды қиындатты. Осы тұрғыдан алғанда, «Ұмай» бағдарламасы әйелдердің тұрғын үй мәселесін шешуге қосымша мүмкіндік береді.

Бағдарламаның тағы бір артықшылығы – салымшылардың тұрғын үй жинақ жүйесін дамытуға ынталандыруы. Себебі депозитті ертерек ашып, тұрақты жинақ жүргізген қатысушылардың мүмкіндік деңгейі жоғары болады.

«Ұмай» ипотекалық бағдарламасы жұмыс істейтін әйелдерге арналған жаңа тұрғын үй мүмкіндігін ұсынады. Бағдарлама аясында жаңа немесе кейінгі нарықтағы тұрғын үйді сатып алуға, зейнетақы жинағын алғашқы жарна ретінде пайдалануға және ұзақ мерзімге несие рәсімдеуге болады. Бағдарламаның нақты шарттары мен өтінім қабылдау күні жақын уақытта белгілі болады.

Біз бұған дейін ипотеканың шекті мөлшерлемесі өзгергені туралы жазған едік.