Ұлытау облысында 23 адам құтқарылды

Ұлытау облысында 23 адам, оның ішінде 5 бала құтқарылды, деп хабарлайды El.kz ақпараттық агенттігі Төтенше жағдайлар министрлігінің баспасөз қызметіне сілтеме жасап. 

2023 жылдың 8 қаңтарында Ұлытау ауданында 23 жолаушысы бар автобус Жезқазған-Ұлытау тас жолында тұрып қалды. Жезқазған қаласынан шыққан көлік ауа-райының қолайсыздығына және көлік құралының техникалық ақаулығына байланысты межелі жерге жете алмады (әйнек тазалағыштардың сынуы салдарынан).

Ұлытау облысы ТЖД және ПД қызметкерлері барлық жолаушыларды эвакуациялап, Ұлытау ауылына жеткізді.

Адамдарды эвакуациялау үшін Ұлытау ауданы әкімдігінен 1 бірлік техника (вахтовка) берілді. Зардап шеккендер жоқ, эвакуацияланғандарға медициналық көмек қажет болған жоқ.