Ұлыбританияда жекеменшік мектептер бас тартып жатыр

Ұлыбританияда жеке мектептердің оқу ақысына 20 пайыздық қосылған құн салығының (ҚҚС) енгізілуі елдегі бай отбасыларды жаңа шешім іздеуге итермеледі. Енді көптеген ата-аналар балаларын Еуропаның құрлықтық бөлігіндегі мектеп-интернаттарға беруді қарастыруда, деп хабарлайды El.kz интернет порталы.

2025 жылдың қаңтарынан бастап салық тек оқу ақысына ғана емес, сонымен қатар тұру, қосымша сабақтар және сыныптан тыс іс-шаралар үшін де салынады. Бұл бастама арқылы лейбористер үкіметі мемлекеттік мектептерге 6500 жаңа мұғалім тарту және бюджет кірісін арттыруды көздеп отыр.

Британияның жеке оқу орындары бұл шешімге қарсы сотқа жүгінгенімен, олардың талап-арыздары қанағаттандырылмады.

Осылайша, көптеген британдық ата-аналар дәстүрлі «британдық білім» жүйесінен алыстап, Германия мен Швейцариядағы жеке мектептерге назар аудара бастады. Бұл елдердің білім беру мекемелері бұрыннан Ұлыбританиямен бәсекелес болатын, ал жаңа салық олардың пайдасына жұмыс істеді. Неміс мектептерінің өкілдері соңғы айларда британдық оқушыларға сұраныс күрт артқанын айтады.

Тіпті кейбір британдық мектептердің өзі Еуропаға қоныс аударуда. Брайтон колледжі секілді беделді оқу орны Мадрид, Рим, Лиссабон және Милан қалаларында филиалдарын ашуды жоспарлап отыр.

Жаңа салық ережелері британдықтардың «мұрагерлік білім» дәстүрін де өзгертті: бұрын балалар көбіне ата-аналары оқыған мектепке түссе, енді көбірек шетелдік оқу орындарын таңдайтын болды.