«Үлкен күнә». Мүфтият татуировкаға қатысты пәтуа шығарды

Тату дәрет пен намазға кедергі емес, дегенмен Ислам дінінде оны денеге салу үлкен күнә болып есептеледі. Бұл туралы Қазақстан мұсылмандары діни басқармасының Ғұламалар кеңесі мәлімдеме жасады, деп хабарлайды El.kz ақпарат агенттігі.

Ұйым татуажға қатысты жаңа пәтуасын жария етті. 

Татуировка – тері астына бояуыштарды ендіру жолымен салынатын адам денесіндегі сурет. Ғұламалар татуировканың харам екендігіне бірауыздан келіскен. Ол – үлкен күнә. Өйткені ол Алланың жаратылысын өзгерту, көзбояушылық, қанның араласуы себепті нәжіс бояумен бояу, денеге зиян беру болып саналады, - делінген мәліметте.

Ғұламалар кеңесі денеге сурет салуға тыйым салынатынын, мүмкіндік болса оны кетіру керектігін алға тартты.

Денеге татуировка салу – харам, үлкен күнә. Тәубе етіп, мүмкіндік болса, оны кетіруі керек. Татуировканы кетіру денсаулыққа зиян болса, оны қалдырудың оқасы жоқ. Ол дәретке, намазға және имамдыққа кедергі болмайды, - деп қосты кеңес.