Үлкен Алматы көлінде жарақат алған қытайлық азамат құтқарылды

Үлкен Алматы көлі маңындағы құтқару операциясы кезінде жарақат алған Қытайдан келген турист құтқарылды, деп хабарлайды El.kz интернет порталы. 

Бүгін Бостандық ауданындағы Үлкен Алматы көлі маңында рейдтік іс-шаралар барысында ТЖМ Республикалық жедел-құтқару жасағының құтқарушылары 2007 жылы туған Қытай азаматын анықтады. Ол саяхат кезінде құлап, жарақат алған.

Алдын ала мәлімет бойынша, оның иығы жарақаттанған. Тау бөктеріндегі күрделі жер бедері мен шектеулі көріну жағдайына қарамастан, РЖҚЖ құтқарушылары жедел түрде алғашқы медициналық көмек көрсетті — жарақаттанған иығына бекіткіш шина салынды. Алғашқы медициналық көмектен кейін зардап шеккен қыз қауіпсіз жерге эвакуацияланып, келген жедел жәрдем бригадасына тапсырылды, - деп жазылған ТЖМ хабарламасында.

Бұл ретте ТЖМ қызметкерлерінің кәсібилігі мен жедел әрекетінің арқасында зардап шеккен шетелдік азамат дер кезінде қажетті көмек алды.