Түрмеде тәртіп бұзған P. Diddy-дің жазасы ұзартылды

Америкалық продюсер және рэпер Шон Комбс (P. Diddy) әзірге түрмеден босатылмайтын болды, деп хабарлайды El.kz интернет порталы.

Музыканттың жазасын өтеу мерзімі түрме ережелерін бірнеше мәрте бұзғанына байланысты ұзартылған. Бұған дейін ол Нью-Джерсидегі Форт-Дикс федералды түзеу мекемесінде 2028 жылдың 8 мамырында босатылады деп жоспарланған еді. Алайда соңғы түзетулерге сәйкес, босату күні 2028 жылдың 4 маусымына ауыстырылды.

Айта кетейік, Шон Комбс 4 жыл 2 ай мерзімге бас бостандығынан айырылған болатын. АҚШ прокурорлары оның ісінде ауырлататын мән-жайлар бар деп санап, 11 жылға дейінгі жаза тағайындауды сұраған еді.

Diddy - әлемге танымал музыкалық продюсер, кәсіпкер және орындаушы. Соңғы жылдары оған қарсы бірнеше құқықтық іс қозғалып, аты жиі жанжалдармен байланысты аталып жүр.