Түркістан облысында жас ұстаз оқушыларды кітапқа баулитын сайт ашты

Түркістан облысы Сарыағаш ауданының ұстазы  Дәуренбек Нұрқұлов оқушыларға арналған «Оян, қазақ» деп аталатын жобаны қолға алып, сайт ашқан. Жоба - мектеп оқушылары арасында кітап оқу мәдениеті мен оқу белсенділігін арттыруға бағытталған, деп хабарлайды El.kz ақпарат агенттігі.

Өңірлік коммуникациялар қызметі ұсынған мәліметке сүйенсек, сайтта "Басты бет", "Жаңалықтар", "Kitap Fest", "E-кітап", "Аудио кітапхана", "Үздіктер тақтасы", "Жобаның авторы", "Кері байланыс" сынды айдарлары бар. Бүгінде сайтты 150-ден астам аудан оқушылары пайдалануда. Жобада 200-ден аса кітап қоры жинақталған.

Дәуренбек Сарыағаш ауданындағы №74 жалпы білім беретін мектебінің қазақ тілі мен әдебиеті пәнінің мұғалімі. Оның сөзінше, жоба жастардың интеллектуалдық және рухани дамуына ықпал етеді. Сондай-ақ, оқушылар түрлі кітаптарды оқу арқылы талқылау және ғылыми-зерттеу жұмыстарымен айналысуға мүмкіндік алады.