Түркістан облысында темекі өнімдерін дайындаған заңсыз цех анықталды

ҚМА Түркістан облысы бойынша департаменті заңсыз темекі өнімдерін (снюс) өндіру, сату және айналымға енгізумен айналысқан қылмыстық топтың қызметін тоқтатты, деп хабарлайды El.kz ақпарат агенттігі.

Агенттік мәліметінше, арнайы операция нәтижесінде 1 000 шаршы метр аумақта күнделікті 30-дан астам жұмыскер жұмыс істейтін заңсыз цех жойылды.

Шикізат дайындау мен логистиканы ұйымдастырудан бастап Астана, Алматы, Шымкент қалаларында және басқа өңірлерде ірі көтерме жеткізушілер арқылы өткізу арналарына дейінгі қылмыстық қызметтің барлық схемасы анықталды, - делінген мәліметте.

Заңсыз айналымнан 10 млн астам тыйым салынған дайын өнім, 28,8 млн бір реттік дозаны құрайтын 14,4 тоннадан астам темекі, 3,3 мың литрден астам хош иістендіргіш пен улы қоспалар, сондай-ақ өндірістік жабдықтар алынды.