Тұрғын үй қорын басқару жүйесі жаппай реформаланады

Мемлекет басшысы Үкіметтің кеңейтілген отырысында сөйлеген сөзінде көмек нағыз мұқтаж адамдарға берілуі керектігін еске салды, деп хабарлайды El.kz ақпарат агенттігі.

Тағы бір мәселе – мемлекет тарапынан берілетін әлеуметтік көмектің нақты иесіне жетуі. Көмек шын мұқтаж адамдарға берілуге тиіс екені қаншама рет айтылды. Қазақстан – шын мәнінде әлеуметтік мемлекет. Бірақ бұл – азаматтарымыздың, әсіресе, өскелең ұрпақтың еңбек етуге ынтасын азайтып, оларды масылдыққа үйрету деген сөз емес, - деді Тоқаев.

Президент тұрғын үй қорын реформалау мәселесіне де тоқталды. Ол салынып жатқан үйлердің сапасына да мән беруді тапсырды.

Тағы бір маңызды міндет – тұрғын үй қорын басқару жүйесін жаппай реформалау. Қала құрылысын жоспарлаудан бастап, нысандарды пайдалануға беруге дейінгі барлық үдерісті цифрлық форматқа толық көшіру қажет. Бірыңғай ақпарат жүйесін жыл соңына дейін әзірлеу керек.

Біз былтыр тұрғын үй құрылысы бойынша рекордтық көрсеткішке қол жеткіздік (19 млн шаршы метр). Бұл – өте жақсы. Бірақ тұрғын үйдің санына емес, сапасына және оның қолжетімді болуына баса назар аударған жөн, - деді президент.