Турбуленттілік кезінде қай қатарда отырған қауіпсіз әрі жайлы?

Ұшақтағы турбуленттілік көп жолаушының мазасын қашырады. Алайда мамандардың айтуынша, салондағы орынды дұрыс таңдасаңыз, ұшу кезіндегі теңселісті айтарлықтай жеңіл сезінуге болады. Бұл туралы  Daily Express басылымы хабарлады.

Теңселіс аз сезілетін орын қайда?

Wizz Air әуе компаниясының ұшқышы Себастьян Харрисонның айтуынша, турбуленттілік кезінде ең қолайлы орындар ұшақтың ортаңғы бөлігінде, шамамен 15-қатар маңында орналасады.

Турбуленттілік тұрғысынан ұшақтағы ең жақсы орындар шамамен 15-қатарда. Себебі ұшақ жоғары немесе төмен теңселген кезде салонның орталық бөлігінде бұл қозғалыс әлдеқайда аз сезіледі, – дейді ұшқыш.

Мұның себебі де қарапайым. Салонның бұл бөлігі ұшақтың қанатының үстінде, яғни ауырлық орталығына жақын орналасқан. Сондықтан ұшақтың алдыңғы немесе артқы бөлігі айтарлықтай көтеріліп-түскенімен, орталық бөліктегі тербеліс әлдеқайда бәсең болады.

Көптеген ұшақта осы маңда апаттық шығу есігінің жанындағы орындар орналасады. Әдетте мұнда аяққа арналған кеңістік көбірек болғандықтан, ұзақ рейстерде жайлырақ саналады.

Алайда мұндай орындардың барлығы бірдей кез келген жолаушыға берілмейді. Өйткені апаттық шығу есігінің жанында отырған адамдар төтенше жағдайда экипаждың нұсқауын орындап, жолаушыларды эвакуациялауға көмектесуге дайын болуы тиіс.

Ұшу жайлылығы үшін орынды қалай таңдаған дұрыс?

Сарапшылар турбуленттіліктен бөлек, ұшу жайлылығына әсер ететін басқа да жайттарды ескеруге кеңес береді.

Салонның алдыңғы бөлігі әдетте тыныш болады, қызмет көрсету де осы жақтан басталады. Сонымен қатар қонғаннан кейін ұшақтан шығу да жеңілірек.

Қанат үстіндегі орындар турбуленттілікті ауыр көтеретін жолаушылар үшін ең қолайлы таңдау саналады.

Жиі орнынан тұрып, еркін қозғалуды қалайтындарға дәліз жақтағы орындар ыңғайлы.

Ал аяққа арналған кеңістік маңызды болса, апаттық шығу есігі немесе аралық қалқа жанындағы орындарды таңдауға болады. Бірақ мұндай орындарда отырған жолаушылар қажет болған жағдайда экипажға көмек көрсетуге міндетті екенін ескерген жөн.