Тоқаев транзиттік тасымал көлемін арттыруды тапсырды

Мемлекет басшысы Қасым-Жомарт Тоқаев Қазақстан халқына жолдауында транзиттік тасымалдың көлемін арттыруды тапсырды, деп хабарлайды El.kz интернет порталы.

Президент транзиттік тасымалдың көлемін арттыру үшін алдын ала әрекет етіп, әрдайым бір қадам алда болуы қажеттігін айтты.

Инфрақұрылымды жаңғырту ісін одан әрі жалғастырып, осы саладағы озық ел болу үшін цифрландыру мен жасанды интеллектіні кең ауқымда пайдаланған жөн. Биыл ұзындығы 836 шақырым болатын Достық-Мойынты теміржолының екінші желісі іске қосылады. Жобаны өз күшімізбен өте қысқа мерзімде жүзеге асырдық, – деді мемлекет басшысы.

Президент көлік-логистиканы одан әрі дамыту керек деп атап өтті.

Еліміз Еуропа мен Азияның арасын жалғап тұрған аса маңызды көпір болып саналатыны кеңінен белгілі. Былтыр біздің территориямыз арқылы жүк тасымалдау көлемі 1 млрд тоннадан асты. Сонымен бірге еліміздің транзиттік әлеуетін арттыруға әлі де зор мүмкіндік бар. Солтүстік-Оңтүстік көлік дәлізі Парсы шығанағы мен Оңтүстік Азия елдерінің нарығына тікелей жол ашады. Ал Шығыс-Батыс дәлізі мен Қытайдың «Бір белдеу, бір жол» жаһандық бастамасы Қазақстанның Еуразиядағы негізгі құрлық жолы ретіндегі рөлін күшейте түседі, – деді Қасым-Жомарт Тоқаев.

Президент бұл бағытта ТрансКаспий көлік бағытын дамытудың маңызы арта бастағанын жеткізді.