Токио әлемдегі ең бай қала атанды

CEOWORLD Magazine дерегінше, 2025 жылы Токио қаласы жалпы ішкі өнім көлемі бойынша әлемдегі ең бай мегаполис атанды. Жапония астанасының ЖІӨ-сі 2,55 триллион долларға жетіп, жеке дара көш бастады, деп хабарлайды El.kz интернет порталы.

Одан кейін 2,49 триллион долларлық экономикасымен Нью-Йорк тұр. Үштікті 1,62 триллион долларға ие Лос-Анджелес түйіндеді. Бұл үш қала жаһандық экономиканың басты тірегіне айналып отыр.

ЖІӨ көрсеткіші қаланың экономикалық қуатын бағалаудың ең кең тараған өлшемдерінің бірі болғанымен, ол мегаполистің әлеуетін толық ашып бере алмайды. Мәселен, Токионың күші ондаған жылдар бойы қалыптасқан технологиялық серпіліс, автомобиль индустриясы және жоғары дамыған өндіріс салаларымен байланысты.

Ал Нью-Йорк - Уолл-стрит пен Нью-Йорк қор биржасы орналасқан, қаржы ағыны үзілмейтін әлемдік қаржы орталығы. Қалада стартаптар экожүйесі де аса белсенді дамып келеді.

Лос-Анджелес экономикасы креатив индустрия мен сауданың тоғысуымен ерекшеленеді. Голливудпен танылған қала қазір технология мен аэроғарыш салаларының дамуы арқылы жаңа серпін алып отыр.

Рейтингте Парижден бастап Сеул мен Шанхайға, Сингапурға дейінгі 300 ірі мегаполис қамтылған. Олар әлемдік капитал қозғалысына, технологиялық трендтерге және халықаралық саясат пен бизнес шешімдерінің таралуына ықпал етеді.

Токио, Нью-Йорк және Лос-Анджелеспен қатар алғашқы ондыққа Лондон, Сеул, Париж, Чикаго, Осака, Сан-Франциско және Шанхай кірді.

Азияның бұл рейтингте басым түсуі жаһандық экономиканың ауырлық орталығының шығысқа ойысқанын көрсетеді. Бұдан бөлек, ең ірі 10 қаланың өзі әлемдік ЖІӨ-нің үштен бірін құрап отыр. Бұл инновация мен капиталдың ірі қалаларда қаншалық шоғырланғанын айғақтайды.