Тек әншілерге емес: «Шәмші Қалдаяқов» медалі кімдерге беріледі?

Құрылтайда «Қазақстан Республикасының мемлекеттік наградалары туралы» заңға өзгерістер мен толықтырулар енгізу туралы заң жобасы қаралды. Әлеуметтік-мәдени даму комитетінің мүшесі Екатерина Смолякова қосымша баяндама жасап, құжат аясында «Шәмші Қалдаяқов» медалі мен «Қазақстанның еңбек сіңірген суретшісі» құрметті атағын енгізуді ұсынды.

Осыдан кейін депутат Гүлісхан Нахбаева медальді тағайындау талаптарына қатысты Мәдениет және ақпарат бірінші вице-министрі Қанат Ысқақовқа сауал жолдады.

Депутаттың айтуынша, Шәмші Қалдаяқовтың есімі халыққа сүйікті әндерімен тығыз байланысты. Сондықтан ол марапатта ән авторларына басымдық беріле ме, әлде музыкалық педагогика мен жас таланттарды тәрбиелеуге үлес қосқан мамандар да үміткер бола ала ма деп сұрады. Қанат Ысқақовтың айтуынша, медальдің қамту аясы кең болады.

Бұл тек эстрадалық немесе дәстүрлі ән орындаушыларға ғана берілмейді. Композиторлар, дирижерлер, ән авторлары, сондай-ақ музыка өнеріне үлес қосқан ұстаздар мен дарынды орындаушылар да марапатқа үміткер бола алады, – деді вице-министр.

Оның сөзінше, медальді тағайындау кезінде азаматтардың өнерге қосқан үлесі мен шығармашылық жетістіктері ескеріледі.

Заң жобасында отандық музыка өнері мен ән шығармашылығын дамытуға ерекше еңбек сіңірген азаматтарды «Шәмші Қалдаяқов» медалімен марапаттау ұсынылған. Ал «Қазақстанның еңбек сіңірген суретшісі» құрметті атағын бейнелеу өнерінде жоғары кәсіби шеберлік танытып, отандық көркем мәдениетті дамытуға үлес қосқан қайраткерлерге беру көзделген.

Құрылтай депутаттары заң жобасын бірінші оқылымда мақұлдады.