«Таза Қазақстан»: «Түлектердің ағаш егуі» акциясы аясында 55 мыңнан астам көшет отырғызылды

2025 жылғы 10–18 сәуір аралығында еліміздің оңтүстік және батыс өңірлерінде «Түлектердің ағаш егуі» атты экологиялық акция өтті. Бұл шараға 1623 мектептің 9 және 11-сынып түлектері – жалпы саны 85 977 оқушы қатысты, деп хабарлайды El.kz ақпарат агенттігі.

Акция аясында 55 787 жеміс ағашының көшеті – алма, алмұрт, өрік, шие, сондай-ақ гүлдер отырғызылды.

Аталған іс-шара түлектердің қоршаған ортаға деген жанашырлығы мен туған жерге алғысын білдіретін игі дәстүрге айналды.

Экология және табиғи ресурстар министрлігінің Экологиялық реттеу және бақылау комитетінің бас сарапшысы Жазира Жақанованың айтуынша:

«Бүгінгі күнге дейін «Таза Қазақстан» бағдарламасы аясында жалпы саны 20 экологиялық іс-шара өткізілді. Оның ішінде:

5 аумақты тазалау акциясы,

5 ағаш отырғызу шарасы,

2 су айдындары мен бастау көздерін тазалау іс-шарасы,

6 экологиялық мәдениетті арттыруға бағытталған білім беру және халықаралық іс-шаралар қамтылды.

Бұл шараларға 350 мыңнан астам адам, соның ішінде 43 мың волонтер қатысты. Нәтижесінде 18 тоннаға жуық қоқыс жиналып, 390 мың гектар аумақ тазартылып, 137 мыңнан астам көшет отырғызылды», – деді сарапшы.