Тәуелсіздік күніне орай елордада конкурдан жарыс өтіп жатыр

Тәуелсіздік күніне орай Астанада конкурдан қалалық чемпионат өтіп жатыр, деп хабарлайды қала әкімдігінің баспасөз қызметіне сілтеме жасап El.kz ақпарат агенттігі.

Байқау әрежесіне сәйкес қатысушылар әртүрлі биіктіктегі 6 бағдар бойынша жүлдені сарапқа салады. Жалпы бәсекеде бағы мен бабы келіскен 100-ге жуық сәйгүліктің шеберлігі паш етіледі.

Конкур жарысына деген қызығушылық жыл өткен сайын артып келеді. Біріншіден, бабаларымыз тұлпарды ерекше қадірлеген. Жылқыға деген қазақ халқының құрметі ерекше. Екіншіден, бәсекеміз күнтізбеге енгізілді. 2025 жылы 8 шараны ұйымдастыру жоспарымызда тұр. Үшіншіден, Олимпиадалық бағдарлама түрі саналатын конкурдан Астанада 4 спорт клубында жаттығуға мүмкіндік бар. Олар: «Астана көкпар», Prestige club, «Тұлпар», «Құлагер». Аталған клубтарда 100-ге жуық спортшы жаттыға алады, - деді «Арғымақ» ат-спорттық сауықтыру кешенінің басшысы Аманжол Хасенов.

Бұл сынға елордан бөлек, Алматы қаласы, Алматы және Қарағанды облыстарынан да спортшылар қатысып жатыр.

Жарыстың жалпы жүлде қоры - 12 миллион теңге.