Тарихи жеңіс пен 36 млн теңге: Бибісара Асаубаева әлемдік шахмат элитасын мойындатты

Қазақстандық шахматшы Бибісара Асаубаева Ослода өткен беделді Norway Chess турнирінің жеңімпазы атанып, жарыстың аяқталуына бір тур қалғанда чемпиондық атағын мерзімінен бұрын қорғады, деп хабарлайды  El.kz интернет порталы.

Norway Chess қандай турнир?

Norway Chess – әлемдегі ең беделді классикалық шахмат турнирлерінің бірі. Ол 2013 жылдан бері Норвегияда ұйымдастырылып келеді және жыл сайын әлемнің ең мықты шахматшыларының басын қосады. Турнирдің ерекшелігі – оған әлем чемпиондары, халықаралық рейтинг көшбасшылары мен элиталық гроссмейстерлер қатысады.

Биылғы жарыста әйелдер мен ерлер арасындағы турнирлердің жүлде қоры тең болды. Әр санатқа 1,6 миллион норвег кроны бөлініп, чемпиондарға негізгі ақшалай сыйлық табысталды.

Жеңістің арқасында Бибісара Асаубаева 700 мың норвег кронын иеленді. Қазіргі бағам бойынша бұл шамамен 36,3 миллион теңгені құрайды.

Бұл оның Norway Chess турниріндегі алғашқы чемпиондық атағы болды. Сонымен қатар қазақстандық шахматшы жарысқа алғаш рет қатысып, дебюттік маусымында-ақ жеңіске жетті.

Бибісара Асаубаева кім?

Бибісара Асаубаева 2004 жылы Тараз қаласында дүниеге келген. Ол – Қазақстан тарихындағы ең танымал жас шахматшылардың бірі әрі халықаралық дәрежедегі гроссмейстер.

Шахматшы әлемге ең алдымен блиц шахматтағы жетістіктерімен танылды. Ол 2021 жылы небәрі 17 жасында әйелдер арасындағы әлем чемпионы атанып, осы атақты жеңіп алған ең жас шахматшы ретінде тарихқа енді. Кейін бұл жетістігін 2022 және 2025 жылдары қайталап, үш дүркін әлем чемпионы атанды.

Бұл жеңістің маңызы қандай?

Norway Chess турниріндегі жеңіс Бибісара Асаубаеваның мансабындағы ең маңызды жетістіктердің бірі саналады. Өйткені ол бұған дейін жылдам және блиц шахматта табысты өнер көрсетсе, енді классикалық шахматтағы ең беделді турнирлердің бірінде чемпион атанып отыр.

Осылайша, қазақстандық шахматшы әлемдік шахмат элитасындағы орнын тағы бір мәрте дәлелдеп, Қазақстан спортының қоржынына тағы бір тарихи жеңіс сыйлады.