Таразда кафелерде кальян шеккен 20 адамға айыппұл салынды

Полиция қызметкерлері Тараз қаласында келушілерге кальян ұсынатын кафе мен барларда рейдтік іс-шаралар өткізіп жатыр. Екі күн ішінде қоғамдық орында кальян тұтынған 20 адам әкімшілік жауапкершілікке тартылды, деп хабарлайды El.kz ақпарат агенттігі.

Тәртіп сақшылары «Vstrecha», «Шишка», «Мансард», «Ескобар», «Мята», «Bult», «Жаным Сол»,  «С Кайфом», «MANSARD», «PABLO» ойын-сауық орындарына тексеру жұмыстарын жүргізген.

Әкімшілік хаттамалар ойын-сауық орындарының иелеріне, сондай-ақ олардың қонақтарына қатысты толтырылды. Рейдтер барысында полицейлер қоғамдық орындарда кальян шегуге тыйым салу, вейптер мен электрондық  темекі таратқаны үшін қарастырылатын  қылмыстық жауапкершілік туралы  талаптарды түсіндіруде. Ағымдағы жылдың 20 маусымынан бастап Жамбыл облысының Полиция департаменті вейптер саудалаған азаматтарға қатысты  3 қылмыстық іс қозғады,-деп атап өтті облыстық ПД.