«Танк биатлоны». Қазақстан танкистері жеңімпаз!

Қазақстан Қарулы күштерінің әскери қызметшілері халықаралық армия ойындарының жарыс алаңдарында табысты өнер көрсетуін жалғастыруда, деп хабарлайды EL.KZ.

Мәскеу маңындағы «Алабино» полигонында «Танк биатлоны» байқауының екінші экипаждарының жарысында қазақстандық танкистер тағы да жеңіске жетті. Танк командирі аға лейтенант Сейітжан Қобыланұлы, көздеуші-оператор сержант Бауыржан Бұғыбаев және механик-жүргізуші ефрейтор Жаннұр Жұмабаевтардан тұратын экипаж кедергілерді еңсеріп, атыс тапсырмаларын сәтті орындап шықты. Қазақ жауынгерлері трассадан 26 минут 35 секундта өте білді. Екінші орындағы Өзбекстан әскери қызметшілерінің нәтижесі – 27 минут 23 секунд.

Әзербайжанда су үсті кемелері экипаждарының қатысуымен «Теңіз кубогы» байқауының бірінші кезеңі өтті. Онда әскери теңізшілер қалқымалы минаның макетін ату тапсырмаларын орындады. 3-дәрежелі капитан Рауан Ергебеков басқаратын қазақстандық «Сарыарқа» кораблінің құрамында ракеталық-артиллериялық жауынгерлік бөлім командирі аға лейтенант Азамат Бақтығалиев пен бас старшина Ерлан Тоқтабаевтар бар экипажы тапсырманы ойдағыдай орындап шықты. Кезең қорытындысы бойынша бірінші орынды 45 балл жинаған Әзербайжан мен Ресейдің әскери теңізшілері өзара бөлісті. Қазақстан командасы 42 ұпаймен екінші орында тұр. 

Кабардино-Балкарияда жасанды жартасты рельефте «Эльбрус сақинасы» байқауының төрт арнайы тапсырмасын орындаған Қазақстан командасы бесінші орыннан үшінші орынға көтерілді. Бұл сайыста Ресейдің әскери альпинистері көш бастап тұрса, екінші орында Өзбекстанның әскери қызметшілері.

Арменияда «Бейбітшілік жауынгері» әскери-спорттық сайысының бірінші кезеңі аяқталды. Сайыс барысында әскери қызметшілер дене шынықтыру даярлығынан нормативтер тапсырды. Жарыс нәтижелері бойынша бірінші орында Беларусь, екінші орында – Қазақстан, үшінші орында – Ресей әскери қызметшілері.