Тамара Дүйсенова: «Бос жұмыс орындарына онлайн жәрмеңке өткізіледі»

Бұл туралы Үкімет отырысында Еңбек және халықты әлеуметтік қорғау министрі Тамара Дүйсенова айтты, деп хабарлайды El.kz

Министрдің сөзінше, бос жұмыс орындарына онлайн жәрмеңке өткізу арқылы жастарды еңбекпен қамту қолға алынады.

«Биыл мамыр айында ERG компаниялар тобымен бірлесіп, білім беру ұйымдарының түлектерін және 35-ке дейінгі жастарды жұмысқа орналастырудың онлайн-жәрмеңкесі пилоттық режимде өткізілді. Компания 350 жұмыс орнын ұсынды. Бір аптаның ішінде жұмыс берушінің талаптарына сәйкес келетін 159 жас іріктеуден өтіп, жұмысқа қабылданды. Олардың арасында еліміздің барлық өңірінің өкілдері бар»,- деді ол.

Сонымен қатар аталмыш жоба келешекте ай сайын тұрақты түрде ұйымдастыру көзделіп отыр. Жәрмеңке тек кәсіпорын орналасқан аймақ тұрғындарына ғана емес, барлық қазақстандықтарға бірдей қолжетімді болуын қамтамасыз етеді.

«Біз халықтың әлеуметтік осал топтары мен жастардың кәсіпкерлік бастамаларын қолдаймыз. Осындай 20 мың грантты қаржыландыруға бюджеттен 25,8 миллиард теңге көзделген. Қазірге дейін 1 мың 400-ден астам азамат грант иегері атанды», - деді министр.

Айта кетсек, министр аталған мемлекеттік қолдау шаралары аясында биыл 500 мыңнан аса адамды жұмыспен қамту көзделгенін айтты.