"Странджа" турнирінде Қазақстан құрамасының төрт боксшысы жартылай финалға шықты

Болгарияда өтіп жатқан дәстүрлі «Странджа» халықаралық турнирінде Қазақстан ұлттық құрамасының төрт боксшысы жартылай финалға өтті, деп хабарлайды El.kz ақпарат агенттігі.

Сонымен қатар, тағы екі отандасымыз жарысты жалғастыру мүмкіндігіне ие болды.

48 келі салмақта өнер көрсеткен Теміртас Жүсіпов ширек финалда әзірбайжандық Субхан Мамедовпен қолғап түйістіріп, 4:1 есебімен жеңіске жетті. Ал 51 келіде ел намысын қорғаған Даниал Сәбит грузиялық Давит Джапаридзені 5:0 есебімен сенімді жеңіп, қарсыласын үшінші раундта нокдаунға түсірді.

63,5 келі салмақта екі бірдей қазақстандық боксшы жартылай финалға өтті. Ертуған Зейнуллин ширек финалда әзірбайжандық Руслан Рустамовпен жекпе-жек өткізіп, төрешілердің бірауыздан шығарған шешімімен 4:1 есебімен басым түсті. Ал осы салмақтағы тағы бір отандасымыз Мұхаммедсабыр Базарбайұлы ирландиялық Джейсон Невинмен кездесіп, 5:0 есебімен айқын жеңіске жетті.

Бұдан бөлек, 60 келі салмақта жұдырықтасқан Талғат Сырымбетов болгариялық Тинко Банабаковтан басым түсті. Қарсыласы ауыр жарақат алып, екінші раундта кездесуден бас тартуға мәжбүр болды. Сондай-ақ, осы салмақтағы Серік Теміржанов ирландиялық Риз Оуэнсті 5:0 есебімен жеңіп, келесі кезеңге жолдама алды.

Алайда кейбір қазақстандық боксшылар жарысты ерте аяқтауға мәжбүр болды. 48 келі салмақта сынға түскен Санжар Тәшкенбай жарақатына байланысты алғашқы жекпе-жегін тоқтатса, 54 келідегі Махмұд Сабырхан дәрігердің шешімімен бүгінгі кездесуіне қатыспайтыны белгілі болды.

Қазақстандық боксшылар халықаралық турнирде жоғары деңгейде өнер көрсетіп, ел намысын лайықты қорғап келеді. Жартылай финалдық жекпе-жектерде де олардың жеңісті жолын жалғастыруы жанкүйерлер үшін үлкен үміт сыйлайды.