Starlink ұялы байланыс операторына айнала ма?

SpaceX компаниясы Starlink спутниктік интернет жүйесін болашақта толыққанды мобильді байланыс желісіне айналдыру мүмкіндігін қарастырып жатыр. Компания спутниктер арқылы 5G байланысын ұсынуды көздейді. Алайда SpaceX-тің серіктесі T-Mobile спутниктік технология әзірге дәстүрлі ұялы байланыс операторларының жерүсті желілерін толық алмастыра алмайтынын мәлімдеді, деп хабарлайды El.kz интернет порталы. 

Қазіргі уақытта SpaceX пен T-Mobile Direct-to-Cell технологиясы негізінде T-Satellite қызметін дамытуда. Оның ерекшелігі – арнайы құрылғысыз-ақ қарапайым смартфондардың Starlink спутниктеріне қосыла алуы. Бұл үшін T-Mobile жиіліктері пайдаланылады.

Қызмет қазіргі таңда ұялы байланыс желісі жоқ аумақтарда хабарлама жіберу және төтенше жағдай туралы ескертулер алу мүмкіндігін береді.

Дегенмен спутниктік байланыстың өзіндік шектеулері бар. Спутниктер жерден өте жоғары қашықтықта орналасқан әрі пайдаланушыға қатысты үнемі қозғалыста болады. Сонымен қатар олардың сигнал тарату қуаты жерүсті ұялы байланыс базалық станцияларымен салыстырғанда төмен.

Сол себепті ғимараттардың ішінде, көліктерде және басқа да жабық кеңістіктерде тұрақты байланысты қамтамасыз ету қиынға соғады.

Тағы бір мәселе – желінің өткізу қабілеті. Халық сирек орналасқан аумақтарда бір спутник бірнеше жүз пайдаланушыға қызмет көрсете алады. Ал ірі қалаларда байланысқа қосылатын адамдар саны миллиондап есептеледі. Мұндай жағдайда барлық абонент спутниктің шектеулі радиоресурсын бөлісуге мәжбүр болады.

SpaceX бұл мәселені шешудің бірнеше жолын қарастырып жатыр. Оның бірі – басқа мобильді операторлардың инфрақұрылымын пайдаланатын виртуалды оператор ретінде жұмыс істеу. Алайда T-Mobile қаржы директоры Питер Освалдиктің айтуынша, АҚШ-тың ірі байланыс операторлары әзірге мұндай ынтымақтастыққа қызығушылық танытпаған.

Тағы бір нұсқа – SpaceX-тің өзіне тиесілі жиіліктер негізінде жеке жерүсті инфрақұрылымын салуы. Бұл жағдайда компанияға көптеген базалық станция орнатып, байланыс желісін дамытуға қомақты қаржы жұмсауға тура келеді.

Компания сонымен бірге шағын базалық станцияларды Starlink-тің үйге орнатылатын антенналарына орналастыру мүмкіндігін де қарастырған. Бірақ T-Mobile бағалауынша, дәстүрлі мобильді желілермен шамалас қамту аймағын қамтамасыз ету үшін шамамен бір миллиард осындай құрылғы қажет болуы мүмкін.

Соған қарамастан SpaceX Direct-to-Cell технологиясын дамытуды жалғастырып келеді. Компания Starlink спутниктерінің жаңа буыны іске қосылғаннан кейін қарапайым смартфондарға деректерді беру жылдамдығы секундына 150 мегабитке дейін жетуі мүмкін екенін мәлімдеді.

Ал T-Mobile спутниктік байланысты әзірге дәстүрлі ұялы желілердің орнын басатын жүйе емес, оларды толықтыратын технология ретінде қарастырады. Мұндай қызмет әсіресе ауылдық жерлерде, ұлттық парктерде және ұялы байланыс мұнараларын салу қиын аймақтарда пайдалы болуы мүмкін.

Осылайша, Starlink-тің мобильді операторға айналу мүмкіндігі әзірге болашақтың жобасы болып отыр. Спутниктік технология байланыс жоқ жерлерді қамтуға мүмкіндік бергенімен, ірі қалалардағы дәстүрлі ұялы желілермен толыққанды бәсекелесу үшін әлі де бірқатар техникалық және инфрақұрылымдық мәселелерді шешу қажет.