СҚО-да  Отан қорғаушылар күні атап өтілді

Отан қорғаушылар күніне орай Петропавлда Ағынтай мен Қарасай батырлар ескерткішіне гүл шоқтарын қою рәсімі өтті, деп хабарлайды El.kz ақпарат агенттігі. 

Іс-шараға қатысушылар Астана қаласында өткен әскери парадтың онлайн-трансляциясын бірге тамашалады. Салтанатты шарада азаматтық сектор өкілдеріне, көктемгі су тасқыны кезінде ерекше көзге түскен әскери қызметшілер мен күш құрылымдарының қызметкерлеріне, сондай-ақ мерзімді әскери борышын өтеп жатқан сарбаздардың аналарына СҚО әкімінің құрмет грамоталары мен Алғыс хаттары табыс етілді. 

Мереке күні  – «Батырлық рухы – Мәңгілік» атты концерт болды. Онда ҚР Ұлттық ұлан академиясының әскери оркестрі, облыстық полиция департаментінің мәдениет орталығының вокалдық тобы, Қызылжар ауданының барабаншы қыздары және өңірдің шығармашылық ұжымдары өнер көрсетті. Бұл мерекелік шара – бейбітшілік пен тыныштықты күзетіп жүрген азаматтарға деген шынайы алғыстың жарқын көрінісі болды.