Шымкентте білім беру мекемесі бір допты 232 мың теңгеге сатып алмақ болған

Шымкент қаласында білім беру мекемесі баскетбол добын 232 000 теңгеге сатып алмақ болған. Бұл туралы Шымкент қаласы бойынша Сыбайлас жемқорлыққа қарсы қызмет департаментінің басшысы Дәурен Ерғарин мәлімдеді, деп хабарлайды  El.kz ақпарат агенттігі.

Ведомство басшысының сөзіне қарағанда, қаладағы №90 дарынды балаларға арналған мамандандырылған мектеп-гимназиясы баскетбол добын 232 мың теңгеге, ал волейбол добын 42 мың теңгеге сатып алуды жоспарлаған.

Қалалық білім басқармасының «№90 дарынды балаларға арналған мамандандырылған мектеп-гимназиясы» КММ мемлекеттік сатып алу жоспарында 2,7 млн бюджет қаражатына 20 доп алуды бекіткен. Тауардың әрбір бірлігі 2-ден 10 есеге дейін асыра бағаланып есептелген. Департамент мемлекеттік сатып алуды ұйымдастырушының атына жоспардың тармағын қайта қарау туралы ұсыныс хат жолдады. Нәтижесінде 2,2 млн теңгеден астам қаржы үнемделді, - деді ол.