Шерзат Болаттың сотында адвокаттары прокурорды істен шеттетуді сұрады

Шерзат Болат ісі бойынша өтіп жатқан сот процесінде сотталушылардың қорғаушылары істі жүргізіп отырған прокурор Дана Сәрсенбайға сенімсіздік білдіріп, оны процестен шеттету туралы сотқа өтінішхат тапсырды, деп хабарлайды El.kz ақпарат агенттігі.

Адвокаттардың айтуынша, прокурор айыпталушыларға қысым көрсетіп, сұрақтарды бұрмалап қояды. Дархан Әскентайдың адвокаты Ержанов бұл жағдайға қатысты: «Өздеріңіз көріп отырсыздар, прокурор сұрақты бұрмалап қойып отыр. Прокурор айыпталушыға қысым жасап отыр», – деп мәлімдеді.

Басқа сотталушылардың қорғаушылары да бұл пікірді қолдап, прокурордың істі бейтарап жүргізіп жатқанына күмән келтірді. Олар соттан Дана Сәрсенбайды істен шеттету туралы өтінішті қанағаттандыруды сұрады.

Өз кезегінде прокурор бұл айыптаулармен келіспей, қорғаушылардың өтінішін негізсіз деп атады. Жәбірленуші тараптың өкілдері де соттан қорғаушылардың өтінішін қабылдамауды талап етті. Осыдан кейін сот алқасы шешім қабылдау үшін кеңесу бөлмесіне үзіліс жариялады.

Айта кетейік, бүгінгі сот отырысында сотталушылардан жауап алу кезеңі басталды.