ШҚО-да алты көппәтерлі үй пайдалануға берілді

Мемлекет басшысы Нұрсұлтан Назарбаевтың тапсырмасы аясында Қазақстан Республикасының Ұлттық қорының қаржысы есебінен Шығыс Қазақстанда делдалсыз 6 көппәтерлі үй пайдалануға беріліп, 14 үйдің құрылысы үшін инженерлік инфрақұрылым жүргізілетін болады.

Жалдамалы тұрғын үй құрылысы мен инженерлік-коммуцникациялық инфрақұрылым жүргізу мақсатында ҚР Ұлттық қорынан 6,5 млрд теңге бөлінген болатын. 2015 жылы жалдамалы тұрғын үйдің құрылысы мен оны алуға «ҚИК» АҚ-да 4,5 млрд теңге қарастырылған. Осы қаржыға Өскемен және Семей қаласы, сондай-ақ Ұлан ауданында 611 пәтерлі 6 үй пайдалануға беріледі.

Бағдарлама аясына Семей қаласында 120 пәтерлі үйге баспанаға ие болғандар көшіріле бастады. Ағымдағы жылы тағы да 126 пәтерлі 2 үйдің құрылысы аяқталмақ.

Ал облыс орталығы Өскеменде осы жылдың шілде айында 225 пәтерлі үйдің құрылысы басталады. Жоспарға сәйкес, тұрғын үй 2016 жылы пайдалануға берілмек. Ұлан ауданының орталығы – Қасым Қайсенов кентінде 140 пәтерлі 2 үйдің құрылысы жүргізілуде.

Сонымен қатар, тұрғын үй құрылысы жүріп жатқан өңірлерге инженерлік инфрақұрылым жүргізу үшін Ұлттық қордан аймақ бюджетіне 2 млрд теңге бөлінді. Бөлінген қаржыға 14 жоба жүзеге асырылатын болады.

Естеріңізге сала кетсек, «Қазақстандық ипотекалық компания» АҚ салған көпқабатты үйлер ең алдымен коммуналдық-тұрғын үйге кезекке тұрғандарға беріледі. Айта кетерлігі, барлық қаржы көздері есебінен Шығыс Қазақстанда 5 860 пәтерлі 70 көпқабатты тұрғын үйдің құрылысы жүргізілуде.