Семейде өрт сөндірушілерге арналған баннер пайда болды

Семейдегі көп қабатты үйлердің бірінде өрт сөндірушілерге алғыс сөзі жазылған үлкен баннер пайда болды, деп хабарлайды El.kz ақпараттық агенттігі.

Семейдің орталық бөлігінде орналасқан көп қабатты ғимараттың қабырғасына өрт сөндірушілерге арналған үлкен баннер ілінді. Суретте «Семей орманы» резерватында болған өртті сөндіру кезінде түсірілген өрт сөндіруші бейнеленген.

Батырларымызға мың алғыс! – деп жазылған.

8 маусым күні Абай облысындағы «Семей орманы» ӨСБ-де басталған өрт тез тарап, 60 мың гектар көлемінде жер аумағын қамтыған. 15 маусымда өрт оқшауланғанымен, оны сөндіру шаралары әлі күнге дейін жалғасуда.

Өкінішке қарай, қызыл жалыннан 15 адам қаза тапты. 

Мемлекет басшысының тапсырмасымен Абай облысында орман өрттерінен қаза тапқандардың отбасыларына Семейден жаңа пәтерлер берілді.

Облыс әкімдігінің мәліметінше, бүгін өрт салдарынан қаза тапқан 14 адамның отбасына, сондай-ақ тракторшы Архиповтың отбасына Семейден жаңа пәтерлердің кілттері табысталды.