Сарбаз өлімі: офицерге қатысты сот үкімі шықты

Астанада Әскери сот мерзімді әскери қызметте болған сарбаз Марат Барқұловты атып өлтірген жас офицер Дамир Досовқа үкім шығарды, деп хабарлайды El.kz ақпарат агенттігі.

Дамир Досов Қылмыстық кодекстің 99-бабы 1-бөлігі (қасақана өлтіру) бойынша кінәлі деп танылып, 13 жылға бас бостандығынан айырылды. 

Дамир Досов жазасын қауіпсіздігі орташа деңгейдегі мекемеде өтейді. Ол ұлттық ұлан лейтенанты шенінен айырылды. Сондай-ақ марқұмның ата-анасына 20 миллион теңге өтемақы төлейді. 

Қайғылы оқиға «Батыс» өңірлік қолбасшылығы бөлімдерінің жиыны кезінде болған. Сағат 17:10 шамасында лагерь бойынша кезекші, гвардия лейтинанты ПМ 9 мм тапаншасынан оқ атқан. Атылған оқ қатардағы жауынгер Марат Ерболұлы Барқұловтың бетіне тиген. Сарбаз ауруханаға жеткізілгенімен, оны аман алып қалу мүмкін болмады.