Рейтинг: интернет-қолданушылары ең көп 20 ел

2025 жылы Жер шары халқының 74 пайызы, яғни шамамен алты миллиард адам интернетті тұрақты пайдаланады. Бұл өткен жылмен салыстырғанда айтарлықтай өсім: 2024 жылы әлем тұрғындарының 71 пайызы немесе 5,8 миллиард адам ғана желіге қосылған еді, деп хабарлайды El.kz интернет порталы.

Соған қарамастан, әлем халқының төрттен бірінен астамы әлі де интернеттен тыс өмір сүріп жатыр. Интернетке қолжетімділік елдердің табыс деңгейіне тікелей байланысты екені анық байқалады. Табыс деңгейі жоғары мемлекеттерде халықтың 94 пайызы желіге қосылған болса, табысы төмен елдерде бұл көрсеткіш небәрі 23 пайызды құрайды.

Инфографика интернет қолданушыларының жалпы саны бойынша әлемдегі алғашқы 20 елді қамтиды. Бұл деректер интернеттің таралу деңгейінен гөрі, ел халқының саны шешуші рөл атқаратынын көрсетеді. Визуализацияға негіз болған мәліметтерді Datareportal платформасы ұсынған.

Рейтингтің көшін Қытай бастап тұр: елде шамамен 1,3 миллиард интернет пайдаланушысы бар, бұл халықтың 90 пайызынан астамын құрайды. Екінші орында – Үндістан. Онда интернетке қосылғандар саны 1,03 миллиардтан асады. Алайда бұл елде интернеттің таралу деңгейі Қытайға қарағанда әлдеқайда төмен – шамамен 70 пайыз. Дегенмен Қытай мен Үндістандағы интернет қолданушылардың жалпы саны алғашқы жиырмалыққа кіретін өзге барлық елдерді қосқанда да көп.

Алғашқы екі орыннан кейінгі көрсеткіштер Индонезия, Бразилия, Пәкістан және Нигерия сынды дамушы елдердің интернет пайдаланушылар саны бойынша көптеген дамыған мемлекеттермен теңесіп немесе олардан озып кеткенін аңғартады. Бұл әлемдік онлайн белсенділіктің біртіндеп Ғаламдық оңтүстікке қарай ойысып жатқанын көрсетеді.

Интернеттің жаһандық ауқымда қарқынды дамуына қарамастан, Африка құрлығы ірі онлайн қауымдастықтар қатарында әлі де әлсіз көрінеді. Алғашқы ондыққа Нигерия ғана енген, ал жалпы топ-20 қатарына құрлықтан бар-жоғы екі ел кірген. Бұл Африкадағы интернеттің төмен таралуы, инфрақұрылымның жеткіліксіздігі, байланыс құнының қымбаттығы және қолжетімділік мәселелері әлі де өзекті екенін көрсетеді.