Ресейлік LIMÉ франчайзингтен бас тартты: Қазақстандағы дүкендер де жабыла ма?

Ресейлік сән бренді LIMÉ франчайзинг үлгісінен толықтай бас тартатынын мәлімдеді. Компания жақын уақытта франшиза негізінде жұмыс істеп тұрған соңғы 14 серіктестік дүкенін жабуды жоспарлап отыр. Алайда бұл өзгеріс Қазақстандағы дүкендерге әсер етпейді.

Компанияның түсіндіруінше, бұл шешім жаңа даму стратегиясымен байланысты. Енді LIMÉ басты назарды өзіне тиесілі бөлшек сауда желісін дамытуға және жаңартуға аударады. Бұл барлық дүкенде бірыңғай дизайн тұжырымдамасын енгізуге және қызмет көрсету сапасын бір деңгейде ұстауға мүмкіндік береді.

Компанияның мақсаты

Forbes басылымының мәліметінше, қазіргі таңда компания жұмыс істеп тұрған дүкендерін жаңғыртуға инвестиция құйып жатыр. Жаңа форматтағы дүкендерде аяқ киім мен іш киімге арналған арнайы бөлімдер, сондай-ақ өзіне-өзі қызмет көрсету кассалары қарастырылған. Онда брендтің әйелдерге, ерлерге және балаларға арналған топтамалары ұсынылады. Биыл мұндай дүкендер Нижний Новгород, Санкт-Петербург және Түмен қалаларында ашылды. Мәскеудегі «Европолис» сауда орталығында тағы бір жаңа дүкеннің ашылуы жоспарланған.

LIMÉ бренді кәсіпкер Дмитрий Хохловтың бастамасымен 2008 жылы құрылған. Бүгінде брендті басқаратын «Стиль-Трейд» компаниясының мәліметінше, Ресейде 60 жеке меншік және 14 серіктестік дүкен, сондай-ақ Дубай, Бахрейн, Армения, Беларусь және Қазақстанды қоса алғанда, шетелде 11 дүкен жұмыс істейді.

Елімізде екі дүкен бар

Қазақстанда LIMÉ брендінің бірнеше фирмалық дүкені жұмыс істейді. Олар Алматы және Астана қалаларында орналасқан. Компанияның мәліметінше, Ресейдегі франчайзингтік дүкендердің жабылуы Қазақстандағы дүкендердің жұмысына әсер етпейді.

2025 жылдың қорытындысы бойынша компанияның табысы 25 пайызға өсіп, 43 млрд рубльге, ал таза пайдасы 2,2 есеге артып, 4,5 млрд рубльге жеткен.

2022 жылға дейін LIMÉ негізінен ауданы 500 шаршы метрге дейінгі шағын дүкендер ашып келді. Ал халықаралық брендтер Ресей нарығынан кеткеннен кейін, 2023 жылы компания ауданы 2 мың шаршы метрден асатын ірі дүкендер ашуға кірісті. Алайда 2026 жылдың шілдесінде бренд жаңа дүкендер ашуды 2027 жылға дейін уақытша тоқтататынын хабарлады.

Франшиза жайлы

LIMÉ франчайзинг бағдарламасын 2013 жылы іске қосқан. Сол кезде серіктестерге гипер, орта және шағын форматтағы дүкендер ұсынылып, ең төменгі инвестиция көлемі 110 мың АҚШ долларын құраған. 2023 жылы брендтің 33 франчайзингтік дүкені болса, кейін компания оларды кезең-кезеңімен өз қарамағына сатып ала бастады. Соның нәтижесінде бүгінде тек 14 серіктестік дүкен қалған және олардың барлығы жабылады.

Сарапшылардың пікірінше, компанияның бұл қадамы қазіргі экономикалық жағдаймен де байланысты. Жоғары пайыздық мөлшерлемелер мен геосаяси белгісіздік кезінде көптеген компаниялар жаңа нарықтарға шығудан гөрі қолдағы активтерін тиімді басқаруға басымдық беріп отыр.

Мамандардың айтуынша, франчайзингтен бас тарту LIMÉ-ге брендтің имиджі мен қызмет көрсету стандартын толық бақылауда ұстауға мүмкіндік береді. Сондай-ақ бұл шешім барлық дүкенде бірдей сапа мен дизайнды сақтап, контрафактілік өнімдердің таралу қаупін азайтуға ықпал етеді.

Соған қарамастан, сарапшылар нарықтағы жағдай өзгерсе, компанияның болашақта франчайзинг моделіне қайта оралу мүмкіндігін де жоққа шығармайды.