Қытайдың шығысында химия зауытында қуатты жарылыс болды

Қытайдың шығысындағы пестицидтер мен химиялық заттар шығаратын зауытта қуатты жарылыс орын алды. Зауытта 500-ден астам қызметкер жұмыс істейді, деп хабарлайды El.kz интернет порталы.

Жарылыстың күші соншалық, зауыттан үш шақырым қашықтықта орналасқан қойманың терезелерін сындырып жіберді. Қазір оқиға орнында 200-ден астам төтенше жағдайлар қызметінің мамандары жұмыс істеп жатыр.

Зауыт Shandong Youdao Chemical компаниясына тиесілі. Бұл компания әлемдегі ең ірі хлорпирифос пестицидін өндіруші болып саналады. Зауыт жыл сайын 11 мың тоннаға жуық зиянкестерге қарсы қолданылатын химиялық зат шығарады. Құрбандар мен жараланғандар саны әзірге белгісіз.