Қытайда қатты аяздан жеті адам қайтыс болды

Қытайда Шыңжаң-Ұйғыр автономиялық ауданында қатты аяздан жеті адам үсіп қайтыс болды, деп хабарлайды El.kz «Синьхуа» агенттігіне сілтеме жасап.

Алтай қаласының халықтық үкіметі 28 қараша күні қатты суық ауа райының салдарынан жеті жұмысшының қаза болғандығы туралы хабарлама жариялады, - делінген қытайлық БАҚ таратқан хабарламада.

Шыңжаңның солтүстігінде орналасқан Алтай округінде өткен демалыста соңғы он жылда орын алмаған төмен температура, қалың қар мен дауылды жер байқалған.

Мәліметтерге сәйкес, боран кезінде жергілікті автоторап учаскелерінің бірінде жұмыс істейтін сегіз жұмысшы жоғалып кеткен. Адамдарды іздеуге шыққан құтқарушылар оларды бір күн өткен соң тапқан.

Сегіз жұмысшы шұғыл түрде ауруханаға жеткізілді. Алайда үсік шалғандықтан жеті жұмысшы көз жұмды.