Құлсары қаласында көшелерді санитарлық тазарту басталды

Атырау облысының Жылыой ауданының орталығында санитарлық тазарту басталды, деп хабарлайды El.kz ақпарат агенттігі.

Жылыой ауданының Құлсары қаласында қалпына келтіру жұмыстары жалғасуда: соңғы тәулікте 55 үй газға, 25 үй электр қуатына қосылды. Бүгінгі таңда 2564 үйден су кетті, сорылған судың жалпы көлемі 3 млн текше метрден асады.

Залалды бағалау және өтеу жөніндегі комиссия 2716 өтініш қабылдап, 600-ден астам үйге техникалық тексеру жүргізді. Сондай-ақ Құлсарының 3600 тұрғыны 100 АЕК мөлшерінде біржолғы материалдық төлем алды. Ол үшін жергілікті бюджеттен 1,3 млрд теңге бөлінді. Су кеткен аумақта дезинфекциялық жұмыстар, сондай-ақ қаланы санитарлық тазарту жұмыстары басталды. Соңғы тәулікте 975 тонна қоқыс шығарылды, - деді Атырау облысы әкімінің баспасөз хатшысы Руслан Жұмағазиев ОКҚ алаңында өткен брифингте.

Махамбет және Индер аудандарында Жайық өзенінің жағалауын нығайту жұмыстары 100% аяқталды, Атырау қаласында жалғасуда.