Қажылыққа жолдама алғанда нені тексеру керек

Астанада Сауд Арабиясына жалған қажылық сапарын ұйымдастырып, 37 азаматтың 60 миллион теңгеге жуық ақшасын иемденген екі тұрғын сотталды. Бұл туралы Астана қаласының прокуратурасы мәлімдеді.

Прокуратура мәліметінше, елорданың екі тұрғыны алдын ала сөз байласып, Instagram әлеуметтік желісінде Сауд Арабиясының Мекке және Мәдина қалаларына қажылық сапарын ұйымдастыру туралы хабарландыру жариялаған. Олардың ұсынысына сенген 37 азамат сапар үшін жалпы сомасы 60 миллион теңгеге жуық қаражат берген.

Алайда ұйымдастырушылар уәде етілген қажылық сапарын ұйымдастырмаған. Тергеу барысында олардың азаматтардан алған ақшаны өз қалауы бойынша жұмсап жібергені анықталған.

Сот үкімімен екі тұрғынның әрқайсысы төрт жылға бас бостандығынан айырылды. Сонымен қатар жәбірленушілердің келтірілген материалдық шығынды өндіріп алу туралы азаматтық талап-арыздары қанағаттандырылды. Сот үкімі әзірге заңды күшіне енген жоқ.

Қажылық сапарын таңдағанда нені ескеру керек?

Қажылық немесе умра сапарына баруды жоспарлаған кезде әлеуметтік желідегі жарнамаға ғана сеніп, ақша аударуға асықпаған жөн. Турды ұсынған компания немесе ұйымдастырушы туралы ақпаратты алдын ала тексеру маңызды.

Ең алдымен компанияның ресми тіркелгеніне, сапарды ұйымдастыруға қажетті құжаттарының бар-жоғына назар аудару қажет. Қызмет көрсету шарттары жазбаша келісімде көрсетілгені дұрыс. Онда сапар мерзімі, бағыты, қонақүй, әуе билеті, қызмет құны, тараптардың міндеттері және сапар орындалмаған жағдайда ақшаны қайтару тәртібі жазылуы тиіс.

Сондай-ақ төлемді жеке адамның картасына аударуды сұраса немесе келісімшарт жасамай тұрып толық соманы төлеуді талап етсе, сақ болған жөн. Төлем жасалған жағдайда чек, түбіртек, келісімшарт және ұйымдастырушымен жазысқан хаттарды сақтап қойған дұрыс.

Алаяқтыққа тап болған жағдайда не істеу керек?

Егер азамат уәде етілген қызметті ала алмаса және алаяқтық белгілері бар деп күмәнданса, полицияға жүгіну қажет. Өтінішке ақша аударылғанын растайтын құжаттарды, келісімшартты, хат алмасу скриншоттарын, жарнаманың көшірмесін және басқа да дәлелдерді қоса берген жөн.

Мұндай жағдайда ұйымдастырушымен болған хат-хабарды немесе әлеуметтік желідегі парақшаны өшірмеу маңызды. Себебі бұл материалдар істің мән-жайын анықтауға көмектесетін дәлелдердің бірі болуы мүмкін.