Қазақстандықтар Арменияға паспортсыз бара алады

Қазақстан азаматтары Арменияға енді тек жеке куәліктің негізінде бара алады. Тиісті заңды Сенат депутаттары мақұлдап, президенттің қол қоюына жіберді, деп хабарлайды El.kz интернет порталы.

Құжатқа сәйкес, елге кірген шетелдіктер ішкі істер органдарында 30 күн өткен соң тіркелуі тиіс. Бұған дейін бұл мерзім 90 күн болатын. Жаңа норма көші-қон бақылауының тиімділігін арттыруға бағытталған.

30 күн елде болдыңыз, одан кейін полицияға барып тіркелуіңіз керек. Қай уақыттан бері жүргеніңізді көрсетесіз. Басқа шектеулер жоқ, – деп түсіндірді ішкі істер министрінің орынбасары Игорь Лепёха Сенат кулуарында.

Сонымен қатар елге кіру үшін қажетті құжаттар айқындалды:

Армения азаматтары үшін – жеке басын куәландыратын карта (Қазақстандағы жеке куәлікке ұқсас);

Қазақстан азаматтары үшін – жеке куәлік (қазір паспорт, соның ішінде қызметтік және дипломатиялық, теңізші куәлігі мен елге қайтуға арналған куәлік талап етіледі).