Қазақстандықтар 8 тоннаға жуық алтын сатып алған

2017 жылы іске қосылған тазартылған алтын құймаларды сату және сатып алу бағдарламасы жүзеге асырыла бастағалы 8 тоннаға жуық өнім сатылды, деп хабарлайды El.kz ақпарат агенттігі.

ҚР Ұлттық банкі 2024 жылдың қорытындысы бойынша екінші деңгейлі банктерге (ЕДБ) және банктік емес жекелеген айырбастау пунктеріне жалпы салмағы 1,7 тонна 47 395 өлшемелі құйма сатты, - делінген хабарламада.

2024 жылы құймалар көп сатылған өңірлер:

• Алматы (32 735 дана, 69 пайыз),
• Шымкент (5 200 дана, 11 пайыз)
• Қарағанды (2 209 дана, 5 пайыз).

Осылайша, 2024 жылы екінші деңгейлі банктер мен банктік емес жекелеген айырбастау пунктері кері сатып алуды ескергенде, халыққа жалпы салмағы 2,5 тонна 71 106 құйма сатқан. Бағдарлама іске қосылғалы жалпы салмағы 7,9 тонна болатын 222 680 алтын құйма сатылған.

Халық арасында сұранысқа ие құйма салмағы – 10 грамм. Жалпы сатылған көлем ішінде оның үлесі 25 пайыз – 54 875 дана. Одан кейін 5 грамдық құйма – 49 145 дана (22 пайыз), 100 грамдық құйма – 47 943 дана (22 пайыз), 20 грамдығы – 40 843 дана (18 пайыз) және 50 грамдық құйма – 29 874 дана (13 пайыз).