Қазақстандық спортшы Болгариядағы турнирде қола медаль жеңіп алды

Болгарияның Панагюриште қаласында «WTT Feeder Panagyurishte» турнирі өз мәресіне жетті. Дүбірлі жарыста отандық теннисші Зәуреш Какшева қола медаль жеңіп алды, деп хабарлайды El.kz интернет порталы.

Турнирге Австрия, Бельгия, Болгария, Германия, Үндістан, Италия, Ирак, Қазақстан, Корея, Молдова, Румыния, Словакия, Сербия, Қытай Тайбэйі, Украина, Франция және Жапония спортшылары қатысты.

Қазақстандық Зауреш Акашева (жаттықтырушысы Эльмира Алиева) италиялық Мириам Карноваленi 3:1 есебімен, словак спортшысы Доминика Вильчкованы 3:0 есебімен, ирандық Шима Сафаэиді 3:2 есебімен жеңді. Алайда украиналық Анастасия Димитренкодан 1:3 есебімен ұтылып, нәтижесінде үшінші орынды иеленді. 

Үстел теннисі федерациясының мәліметінше турнирде қазақстандықтар арасынан ширек финалға дейін жеткендер:

Жанерке Қошқұлбаева (жеке разряд);

Владислав Захаров / Дайто Оно (Қазақстан/Жапония, жұптық разряд);

Зауреш Акашева / Сарвиноз Миркадирова (жұптық разряд);

Жанерке Қошқұлбаева / Элина Рахими (Қазақстан/Иран, жұптық разряд);

Искендер Харки / Сарвиноз Миркадирова (аралас разряд).