Қазақстандық еркін күрес шеберлері әлем чемпионатын екі медальмен аяқтады

Күрес түрлерінен Хорватияның Загреб қаласында өтіп жатқан әлем чемпионаты аясында еркін күрес жарыстары аяқталды, деп хабарлайды El.kz интернет порталы.

Қазақстан балуандар финалға шыға алмады. Нұрқожа Қайпанов (70 келіге дейін) алтынға бір қадам жетпей қалды.

Ол жартылай финалда моңғолиялық Тулга Тумур Очирға есе жіберді. Нәтижесінде Нұрқожа үшінші орын үшін өткен белдесуде молдовалық Василий Дьяконды жеңіп, әлем чемпионатын қола медальмен аяқтады.

Сондай-ақ, Асылжан Есенгелді (61 келіге дейін) де үшінші орынға ие болды. Ол қола жүлде үшін өткен кездесуде америкалық Джексон Форрестен басым түсті.

Осылайша, Қазақстан құрамасы әлем чемпионатын екі қола медальмен аяқтады. Ал Камиль Қуруглиев (92 келіге дейін) бесінші орынға тұрақтады.