Қазақстандық бишілер театры Қытайда үш Гран-при иеленді

Qyzyljar Creative centre креативті хабының өкілдері халықаралық фестивальде үш Гран-при иеленді, деп хабарлайды El.kz ақпарат агенттігі.

Мәдениет және ақпарат министрлігінің мәліметінше, Солтүстік Қазақстан облысындағы Qyzyljar Creative centre креативті хабының өкілдері, есту қабілеті шектеулі «Sensitive» бишілер театры Қытайда өткен «Тяньцзинь кестелері – 2025» атты II Халықаралық байқау-фестивалінде үш Гран-при жеңіп алды.

Байқауға Қытай Халық Республикасы, Чехия, Моңғолия, Болгария, Ресей және басқа да елдерден 700-ден астам өнерпаз қатысты. Қазақстандық ұжым бірнеше номинация бойынша үздік деп танылды. Атап айтсақ, «Халық стиліндегі би», «Заманауи хореография» және «Оригинал жанр», - делінген мәліметте.

Айта кетейік, «Sensitive» есту қабілеті шектеулі бишілер театрына 18 жыл толды. 2024 жылы ұжым облыстық креативті хабтың резиденті атанып, креативті секторда ерекше қажеттіліктері бар жандарға жағдай жасаумен айналысып келеді.