Қазақстанды дамытуға елеулі үлес қосатын ұлттық буржуазия керек – президент

Президент мемлекеттік мекемелердің бюджетін тұрақты тексеріп, қаржының оңды-солды жұмсалуына жол бермеуді тапсырды, деп хабарлайды El.kz ақпарат агенттігі.

Қазір бюджеттің кірісі мен шығысы қайта қаралып жатыр. Қаржыны оңды-солды жұмсауға болмайды, бұл – ақиқат. Мемлекеттік мекемелердің бюджетін тексеріп отырмаса, шығыстары ұлғая береді. Мұны қатаң бақылауда ұстау керек. Тағы да қайталап айтамын. Қаражат ең қажет жобаларға, ең маңызды мәселелерді шешуге жұмсалуы қажет, - деді Тоқаев.

Президент кәсіпкерлікті дамытуға айрықша мән беріп отырған еліміз аймақтағы ашық нарықтық экономикасы бар маңызды орталыққа айналуы керек екенін айта келе ұлттық буржуазияға зор міндет жүктеді.

Мен ұлттық буржуазия туралы ой-тұжырымды осыдан 24 жыл бұрын Давос экономикалық форумында атап өттім. Бұл жерде ұлттық деген сөз кәсіпкердің ұлтына емес, оның азаматтық сана-сезіміне қатысты айтылып отыр. Яғни, елімізге қоғам алдындағы жоғары жауапкершілігін сезінетін және Қазақстанды дамытуға елеулі үлес қосатын ұлттық буржуазия керек, - деді ол.