Қазақстанда ыстықтың беті қашан қайтады

Қазгидромет алдағы үш күнге арналған ауа райы болжамын жариялады, деп хабарлайды El.kz ақпарат агенттігі.

Мамыр айының басында Иран аймақтарынан жылы ауа массаларының келуі Қазақстанның көп бөлігінде жауын-шашынсыз ыстық ауа райының сақталуына себеп болады. Күндізгі уақытта термометр бағаны оңтүстікте 35-44°С, солтүстік, орталық және шығыс өңірлерде 35-37°С көрсетеді. Абай мен Ұлытау облыстарының оңтүстігінде, сондай-ақ Қарағанды облысында өте қатты ыстық – 40°С күтіледі.

Алайда 16 мамырда еліміздің батыс, солтүстік-батыс және солтүстік өңірлеріне атмосфералық фронтальді бөліктер әсер етіп, найзағайлы жаңбыр мен бұршақ әкеледі. Маңғыстау облысында қатты жаңбыр күтіледі. 17 мамырда Қазақстанның басым бөлігінде найзағайлы жаңбыр мен бұршақ жауады, кейбір өңірлерде қатты жаңбыр мен дауылды жел күтіледі. Осыған байланысты елдің солтүстік жартысында күндізгі температура 18-28°С-қа дейін төмендейді, алайда оңтүстік өңірлерде 43°С-қа дейінгі қатты ыстық сақталады.

Республика бойынша желдің күшеюі күтіледі, ал оңтүстік өңірлерде шаңды дауыл болуы мүмкін.