Қазақстанда вице-президент лауазымы пайда болады

Қызылордада өткен Ұлттық құрылтайда Мемлекет басшысы Қасым-Жомарт Тоқаев Қазақстанда вице-президент лауазымын енгізу туралы мәлімдеді, деп хабарлайды El.kz интернет порталы.

Президенттің айтуынша, бұл қызметті тек президент өзі тағайындайды, ал оның өкілеттігі мен міндеттері Конституцияда нақты бекітілуі тиіс.

Вице-президент президенттің тапсырмасы бойынша Қазақстан Республикасының мүдделерін халықаралық форумдарда, шетелдік мемлекеттердің делегацияларымен келіссөздерде ұсынады. Сондай-ақ Президенттің атынан Парламентпен әрекеттеседі, отандық және шетелдік қоғамдық, саяси, ғылыми, мәдени және ағартушылық ұйымдармен байланыс жасайды, сонымен қатар басқа да Президент тапсырмаларын орындайды, – деді Қасым-Жомарт Тоқаев.

Президенттің пікірінше, вице-президенттің қызметі елдің халықаралық аренадағы имиджін нығайтуға, мемлекет басшысының мүддесін тиімді қорғауға және заң шығарушы органмен үйлесімді жұмыс істеуге бағытталған.

Сонымен қатар Президент қазіргі Парламент жұмысына қызмет көрсететін кейбір аппараттық құрылымдар мен мемлекеттік кеңесші лауазымын жою қажеттігін атап өтті.

Вице-президент институтын енгізу арқылы біз мемлекеттік басқару жүйесін тиімдірек, заманауи әрі халықаралық стандарттарға сәйкес етуге мүмкіндік аламыз, – деді мемлекет басшысы.