Қазақстанда паранджа мен никаб киюге тыйым салынуы мүмкін

Қазақстанда бет-жүзді жабатын киімдерге, соның ішінде паранджа, никаб және өзге де жабық киімдерге тыйым салу ұсынылып отыр. Тиісті түзетулер 2024 жылғы 10 маусымда Сенат отырысында «Құқықбұзушылықтың алдын алу туралы» заң жобасын талқылау барысында қаралды, деп хабарлайды El.kz интернет порталы.

Ұсынылған түзетулерге сәйкес, тыйым мынадай жағдайларда ғана қолданылмайды. Атап айтқанда:

• Заң талабына сәйкес киінуге мәжбүр болғанда;
• Медициналық мақсатта;
• Азаматтық қорғаныс кезінде;
• Ауа райының ерекше жағдайларында;
• Спорттық және мәдени-бұқаралық іс-шараларға қатысу барысында.

Бұған дейін президент Қасым-Жомарт Тоқаев бет-жүзді толық жабатын киімдерге қарсы пікір білдіріп, олардың орнына ұлттық болмысты айқындайтын киімдерді таңдауға шақырған болатын.

Айта кетейік, 2025 жылдың қаңтарында Қырғызстанда никаб киюге қатысты ұқсас заң қабылданып, оны қоғамдық орындарда киюге тыйым салынды. Бірнеше айдан кейін елдің қалаларында заңның орындалуын бақылауға арналған арнайы рейдтер өткізілген.

Естеріңізде болса, осыдан біраз бұрын никаб киіп Қазақстанның туын қорлаған қыздар жазаланған болатын. Ал былтыр Дағыстанда да никаб киюге тыйым салынған.