Қазақстанда автокөліктерді қайта жабдықтауға рұқсат алу тәртібін жеңілдету жоспарланып отыр. Ішкі істер министрлігі бұл бағыттағы өзгерістерді қоғамдық талқылауға ұсынды. Күтіліп отырған басты жаңалықтың бірі – бірқатар құжаттарды цифрлық форматқа көшіру.

«Ашық НҚА» порталында автокөліктер мен тіркемелерді қайта жабдықтау жөніндегі куәліктерді беру тәртібіне өзгерістер енгізу туралы бұйрық жобасы жарияланды.

Жобаның негізгі мақсаты – рәсімдеу процесін автоматтандыру. Егер өзгерістер қабылданса, жүргізушілер кейбір анықтамалар мен құжаттарды қағаз түрінде тапсырудан босатылады. Мемлекеттік органдар қажетті мәліметтерді ақпараттық жүйелер арқылы өзара алмасу негізінде алады.

Сондай-ақ құжат қолданыстағы заңнамаға сәйкестендіріліп, қызмет көрсету мерзімі қысқарып, рәсімдеу тәртібі ыңғайлырақ болады деп күтілуде.

2026 жылы қандай құжаттар қажет болады?

Көлікті қайта жабдықтау рәсімінен өткізу үшін азамат арнайы ХҚКО-ға конструкциясына өзгеріс енгізілген автокөлікті апарып, өтініш береді.

Өтінішке төмендегі құжаттар қоса тіркеледі:

• көлік құралының конструкциясына өзгеріс енгізу мүмкіндігі мен тәртібі туралы әкімшілік полицияның аумақтық бөлімшелері беретін қорытынды;
• пайдаланылған бөлшектер мен компоненттердің сәйкестік сертификаттарының көшірмелері (бар болса);
• техникалық қызмет көрсету станциясы беретін атқарылған жұмыстардың көлемі мен сапасы туралы декларация;
• аккредиттелген сынақ зертханасы беретін қауіпсіздік тексеру хаттамасы;
• техникалық байқау орталығы рәсімдейтін диагностикалық карта

Қандай өзгерістер қайта жабдықтау болып саналады?

Төмендегі өзгерістер ресми түрде қайта жабдықтау ретінде есептеледі:

• зауытта қарастырылмаған шатыр багажнигін орнату;
• тіркеме тартуға арналған фаркопты немесе алдыңғы қорғаныш темір доғасын орнату;
• аспаны (подвеска) көтеру немесе төмендету, яғни лифт жасау;
• өндіруші қарастырмаған қосымша жарық шамдарын орнату.

Мұндай өзгерістер міндетті түрде заңдастырылуы тиіс. Бұл жол қозғалысы қауіпсіздігін қамтамасыз етуге және техникалық талаптардың сақталуына қажет. Заңсыз өзгертілген көлік айыппұлға немесе тіркеуден бас тартуға әкелуі мүмкін.

Бұған дейін егер көлікте міндетті жабдықтар болмаса, жүргізушіге айыппұл салынуы мүмкін екені туралы жаздық.