Қазақстанда электромобильдер саны күрт артты

Қазақстанда электромобильдер саны өсіп жатыр, алайда жалпы автопарктегі үлесі әлі де өте төмен. Energyprom порталының дерегінше, 2025 жылдың тамызының басында елде 19,1 мың электрокар тіркелген – бұл өткен жылмен салыстырғанда 79%-ға көп, деп хабарлайды El.kz интернет порталы.

2025 жылдың алғашқы жеті айында қазақстандықтар 6,9 мың аккумулятормен жүретін көлікті тіркеткен. Дегенмен бұл барлық автокөліктер үлесінің небәрі 0,7%-ын құрайды. Салыстыру үшін: бензинмен жүретін жеңіл көліктер нарықтың 88%-ын, дизельмен жүретіндер шамамен 1,5%-ын иеленіп отыр.

Электромобильдер ең көп тіркелген өңір

Электромобильдер ең көп шоғырланған аймақ – Алматы қаласы. Мұнда 11,3 мың электрокар, яғни елдегі барлық электромобильдердің шамамен 60%-ы тіркелген. Оңтүстік астанада олардың үлесі барлық көліктердің 1,6%-ына жетті.

Астанада 2,2 мың электромобиль бар (қалалық автопарктің 0,5%-ы), ал Алматы облысында – 1,2 мың (бар болғаны 0,2%-ы). Ең аз электромобиль тіркелген аймақтар – Абай және Ұлытау облыстары, мұнда тек бірнеше ондаған көлік бар.

Қазақстан және әлемдік жағдай

Қазақстанда өсім айқын болғанымен, әлемдік ауқымда бұл көрсеткіш әлі де тым төмен. Қазіргі таңда электромобильдер ел автопаркінің небәрі 0,3%-ын құрайды. Салыстырып қарасақ, 2025 жылдың бірінші тоқсанында әлемдегі жаңа көліктердің 14,5%-ы электрокарлар болды. Әлемдік көшбасшы – Қытай, онда әлемдегі электромобильдердің жартысынан астамы тіркеледі.