Қазақстанда балалардың әлеуметтік желіге тіркелуіне шектеу қойылуы мүмкін

Қазақстанда 16 жасқа толмағандардың әлеуметтік желілерде жеке аккаунт ашуына тыйым салу мәселесі қарастырылып жатыр. Мәдениет және ақпарат министрлігі әзірлеген заң жобасы қазір қоғамдық талқылауға ұсынылған, деп хабарлайды El.kz интернет порталы.

Жобада көрсетілгендей, кәмелетке толмағандар TikTok, Instagram сияқты әлеуметтік желілерде немесе YouTube тәрізді платформаларда жеке парақша жасай алмайды. Оларға тек мессенджерлерді пайдалану құқығы сақталады. Мұндай шара балаларды зиянды ақпараттан қорғау мақсатында енгізілмек.

Әлемдік практикада дәл осы заң жүйесін Австралия да енгізіп жатыр. Ел үкіметі Meta компаниясының Instagram, Facebook және Threads платформаларында жасөспірімдерге тиесілі жүздеген мың аккаунтты бұғаттауды қолға алды. Жасөспірімдердің әлеуметтік желіні қолдануына тыйым салатын заң 10 желтоқсанда күшіне енеді.

Бұл шектеулер, балаларды қауіпті контенттен қорғаудың тиімді жолы деп саналады. Жаңа талапты ата-аналардың басым бөлігі қолдап отыр.

Бұған дейін, балаларды жат идеологиядан қорғау жайлы жазған едік.