Қазақстанда автопарктің жартысына жуығы ескірген

Қазақстанда жеңіл көліктердің шамамен жартысы 20 жылдан асқан. Мұндай дерек ІІМ мен Ұлттық статистика бюросының мәліметтерін талдау барысында анықталды, деп хабарлайды El.kz интернет порталы.

Ескі көліктер басым

1 қыркүйектегі жағдай бойынша елде 5,8 миллионнан астам жеңіл автомобиль тіркелген. Оның ішінде 2,4 миллионы – яғни 41,5%-ының қолданылу мерзімі 20 жылдан асқан. Ал 10-20 жылдық көліктер – 24,2%, 3-7 жылдықтары – 17,2%, 7-10 жылдықтары – 10,3%, 3 жылдан көліктер бар болғаны 6,8%-ды құрайды.

Ұқсас жағдай басқа көлік түрлерінде де байқалады. Жүк көліктерінің 51%-ы мен мотоциклдердің 53,7%-ы да 20 жылдан асып кеткен. Ал автобустар негізінен 10-20 жылдық жас санатында – 38,2%.

Қай өңірлерде ескі көліктер көп

Өңірлік көрсеткіштер айтарлықтай айырмашылықты көрсетеді. Ең «кәрі» автопарк Жамбыл облысында — мұндағы көліктердің 63,1%-ы 20 жылдан ескі. Жетісу облысында – 59,3%, Алматы облысында – 56,9%, Солтүстік Қазақстанда – 52,9%, Шығыс Қазақстанда – 50,2%, Ақмола облысында – 50,8%.

Ал ең жас автопарк Атырау облысында: мұнда көліктердің 11,5%-ының пайдалануға берілгеніне үш жылдан аспаған. Бұл - ел бойынша ең үздік көрсеткіш.

Алматы мен Шымкенттегі жағдай

Алматыда көліктердің 29,6%-ы 20 жылдан асқан. Дегенмен 3-7 жылдық темір тұлпарлардың үлесі де айтарлықтай – 25,9%. Ал 10-20 жылдықтар – 24,6%, 7-10 жылдықтар – 11%, үш жылдан жас көліктер – 8,9%.

Шымкенттегі жағдай бөлек: мұнда 20 жылдан асқан көліктер – 29,2%, 10-20 жылдықтар – 27,1%, 3-7 жылдықтар – 24%. Ал 3 жыл болмаған көліктердің үлесі 8,6%-ды құрайды.