Қазақстан 2026 жылы «Games of the Future» халықаралық фиджитал турнирін қабылдайды

Қазақстан 2026 жылы фиджитал тұжырымдамаға негізделген халықаралық көпспортты турнир – Games of the Future жарысын өткізуге дайындалуда, деп хабарлайды El.kz интернет порталы.

Бұл спорттық іс-шара физикалық және цифрлық элементтерді біріктіретін жарыстарды қамтиды. Ұйымдастырушылардың мәлімдеуінше, турнирге 100-ден астам елден қатысушылар келіп, жанкүйерлердің де ағыны күтілуде.

Қазақстан ірі халықаралық іс-шараларды өткізу тәжірибесіне ие, сондықтан турнирдің жоғары деңгейде өтетініне сенеміз, – деді ұйымдастыру дирекциясының басшысы Әлібек Хасенов «World Phygital Summit 2025» барысында.

Фиджитал спорт бүгінде әлем бойынша қарқынды дамып келеді. World Phygital Community (WPC) қауымдастығына 100-ге жуық елдің өкілдері мүше. Олар өз елдерінде іріктеу турнирлерін өткізіп, үздік спортшыларды «Games of the Future» турниріне жібереді.

2024 жылы бұл турнир Қазан қаласында өткен. Ашылу рәсіміне Қазақстан Президенті Қасым-Жомарт Тоқаев та қатысып, турнирді келесі жолы Қазақстанда өткізу бастамасын көтерген. 21 инновациялық спорт түрінен өткен жарысқа 2000-ға жуық спортшы қатысып, жалпы жүлде қоры 10 млн долларды құраған. Қазақстандық спортшылар 13 дисциплинада өнер көрсетті.

Келесі Games of the Future 2025 турнирі желтоқсанда Абу-Дабиде өтеді.