Қазақконцерт «Алдар көсе» мюзиклына шақырады

30 қараша күні Қазақконцертте «АЛДАР КӨСЕ» мюзиклы өтеді, деп хабарлайды El.kz ақпарат агенттігі.

Қазақконцерт мәліметінше, «Алдар көсе» мюзиклының премьерасын 2022 жылдың желтоқсан айында Орталық Азиядағы тұңғыш «ASTANA MUSICAL» мемлекеттік мюзикл театры ұсынған болатын.

Қойылымның сюжетінде қазақ халқының жарқын, қызықты және тағылымды көрінісі баяндалады. Сондай-ақ мюзикл халық батырының мәңгілік бейнесін жасауға, мықты тұлға ретінде қалыптастыруға, адамгершілік-рухани құндылықтарды, даналық пен тапқырлықты дәріптеуге бағытталған. Басты кейіпкер кедейлерді зұлымдық пен сараң байлардан қорғап жүреді. Әрі шапшаң, әрі жүйрік Алдар көсе үнемі қиын жағдайлардан шығып кетуге тырысады, - делінген мәліметте.

Мюзиклдың қоюшы-режиссеры – «Astana Musical» мемлекеттік театрының көркемдік жетекшісі Есләм Нұртазин, қойылымның авторлары – Ефрат Шарипов, Шыңғыс Маман, Есләм Нұртазин, Әннәс Бағдат, композитор – Ербол Нариманұлы, Ақжол Өмірзақов.