Қаскелеңде компания басшылығы үлескерлердің 972 млн теңгесін иемденген

Қаржылық мониторинг агенттігі Алматы облысы бойынша департаменті Қаскелең қаласында көпқабатты тұрғын үйлердің құрылысы кезінде аса ірі көлемде жасалған алаяқтық фактісі бойынша тергеуді аяқтады, деп хабарлайды El.kz ақпарат агенттігі.

ҚМА мәліметінше, тергеу кезінде «Tоредо» жауапкершілігі шектеулі серіктестігінің басшылары 2021-2023 жылдары құрылысқа рұқсатсыз – яғни лицензиясыз, қажетті құжаттарсыз және жобалық-сметалық құжаттамасыз жұмыс істегені белгілі болды.

Соған қарамастан олар «НOME», «НOME Южный», «НOME SAU», «НOME МAK» тұрғын үй кешендерін әлеуметтік желілерде белсенді түрде жарнамалаған. Бірыңғай тұрғын үй құрылысы операторының міндетті кепілдігі болмағанына қарамастан, олар жарнама арқылы 100-ден астам азаматтан 972 млн теңге жинаған, - делінген мәліметте.

Сонымен қатар құрылыс жұмыстары талапқа сай жүргізілмей, белгіленген мерзімде аяқталмаған.

Сот санкциясымен күдіктілердің 240 млн теңгеден асатын мүлкіне тыйым салынды. Олардың ішінде 12 жер телімі, 9 автокөлік, аяқталмаған үш қабатты ғимарат және жеке тұрғын үй бар, - деп қосты агенттік.

Қазіргі уақытта күдіктілер қамауда. Іс сотқа жіберілді.