Қарағандыда Жеңіс күніне орай соғыс ардагерлеріне 3 млн теңгеден беріледі

Қарағанды облысында Жеңіс күніне орай төленетін біржолғы материалдық көмектің сомасы белгілі болды. Әкімдік соғыс қатысушылары 3 млн теңгеден алатынын атап өтті, деп хабарлайды El.kz ақпарат агенттігі.

Бұдан өзге жеңілдіктер бойынша ҰОС ардагерлеріне теңестірілгендерге: концлагерлер тұтқындарына және қоршаудағы Ленинград тұрғындарына – 200 мың теңгеден, тыл еңбеккерлеріне – 100 мың теңгеден, ҰОС жылдары қаза тапқан жауынгерлердің жесірлері мен әйелдеріне – 50 мың теңгеден төлемдер қарастырылған. Сонымен қатар, мерейтойлық медальдар тапсырылады.

Қазіргі уақытта Қарағанды облысында 3 240 ардагер тұрады, олардың 9-ы Ұлы Отан соғысының ардагерлері. Өңірде Жеңістің 80 жылдығын мерекелеуге дайындық басталып кетті. 

Жеңістің 80 жылдығын мерекелеу бастау алды. Ұлы Отан соғысының ардагерлері Қали Аманбаев пен Қамали Дүйсембековтың 100 жылдығына арналған іс-шаралар өтті. Қазіргі уақытта соғыс ардагерлері мен тыл еңбеккерлерінің әлеуметтік мәселелерін шешу жөніндегі жұмысты үйлестіретін облыстық және өңірлік штабтар құрылуда, – деді аппараттық кеңесте ішкі саясат басқармасының басшысы Нұрлан Бикенов.

Жастар ұйымдары еріктілерінің қатысуымен «Ардагерлерге тағзым» қайырымдылық акциясы ұйымдастырылады. Сондай-ақ, мектеп оқушыларына арналған патриоттық іс-шаралар: сынып сағаттары, ерлік сабақтары, конкурстар жоспарланған. «Айбын» әскери-патриоттық жиыны өтеді.

Әдеттегідей онлайн-форматта өмірден озған батырлардың есімін мәңгі есте қалдыру үшін «Ер есімі – ел есінде» акциясы өткізіледі.

Бүгінде облыста 171 Жауынгерлік Даңқ ескерткіші бар.

Ардагерлердің ешқайсысы да назардан тыс қалмауы керек, – деді облыс әкімі Ермағанбет Бөлекпаев.

Аймақ әкімі басқармалардың басшыларына Жеңістің 80 жылдығына арналған іс-шараларды өткізуге қатысты бірқатар тапсырмаларды берді.